Իջնում է ձյունը...

Ձմեռ է: Ձյուն է...

Իջնում են հանդարտ ճերմակ փաթիլներ,

Իջնում են կամա՜ց, քնքշորե՜ն ու զգու՜յշ,

Անմեղ արցունքի անթիվ կաթիլներ 

Չքացան: Հիմա անդորր է, մշուշ:

Սիրտս, որ անհագ ապրում էր քեզնով,

Հոգիս, որ համառ տենչում էր միշտ քեզ,

Սերս, որ շնչում էր միայն քո շնչով 

Խլեցի քեզնից և ազատ եմ ես:

Պարում է ձյունը չքնաղ գիշերում, 

Երգում է ձյունը իմ սիրո մասին,

Սիրո, որ ամուր փակվել իմ սրտում,

Երազում էր միշտ միայն քո մասին:

Բայց նա չգիտի, որ դու խաբկանք ես,

Չգիտի, որ դու ունես վառ դիմակ,

Նա դեռ չգիտի, որ չեմ սիրում քեզ.

Ես նրան դա եմ ասում շարունակ:

Իջնում է ձյունը հանդա՜րտ, անաղմու՜կ,

Որ չխանգարի անդորրը սրտիս,

Փայլում է լուսնի շողերում դալուկ

Եվ ծածկում փայլը անցած հուշերիս:

Իսկ ազատությու՜նս...Չէ՞ որ իսկապես

Ազատ եմ հիմա, էլ չեմ սիրում քեզ:

Իջնում է ձյունը. չքնա՜ղ մի հանդես,

Իսկ այս պայքարում ես հաղթել եմ քեզ:

Ձմեռ է: Ձյուն է...

A.M.